Kalabing baya sa pinoy

Dihang naglaag-laag ako,

kini ang akong nakita,

pwerte gyud ka labing sa pinoy...

Nagsinabakay,

nag-agbayay

murag bag-ong minyo...

Kinsay ingon pobre ang pilipino?

Kada bag-ong tuig

ako makapangutana...

Kinsay ingon pobre ang pilipino?

Ngano man?

kay bisan asa nga suok sa atong nasud

adunay naninda ug pabuto,

unya dili kini siya barato...

Triangle,

libintador,

bakus ni hudas,

kwetes,

fountain...

unsahay bala,

sa pistola,

shotgun,

45, 33, ug uban pa...

kani tanan baligya,

para makapabuto sa alas doce,

sugdan ang bag-ong tuig

sa pagsunog sa kwarta...

busa,

ayaw mo pagtuo,

nga ang pilipino,

nagkalisud,

kay sunugon man gani ang kwarta...

pakapinan pa ug pila ka tudlo ug abaga...

Unya magbuot mo sa pilipino

kung unsaon niya pag-gasto

ang iyahang kwarta...

Lain nga klase sa tabanog...

Dihang padulong ko ug uli

gikan sa akong probinsiya

Mingagi ako sa SRP

ug kini akong nakita...

Usa ka tawo,

galingkod sa wheelchair,

sa likud sa usa ka pick-up,

nagkapot ug payong,

kay hadlok mainitan...

Pwerte ka kusog

ang padagan 

sa sakyanan...

Ang tawo,

pwerteng pangunit 

sa iyang payung,

kay siya murag tabanog

nga hapit nang luparon...

Hay pagka-amaw gyud...

Nindot untang tan-awon

Usa ka bag-ong klase nga tabanog,

Tawo,

galingkod sa wheelchair

gibira sa usa ka payong...

Basin mag-abot

sila sa langit

magkita ug si Mary Poppins...

Nganong barato ang manok?

Add caption

Ang manok.

Unsa ang kinabuhi sa usa ka manok?

Ang iyang inahan,

ang kinaon kemikal

 para mapugos ug pangitlog,

inig gawas sa itlog,

isulog ug kahon aron mapusa,

inig kapusa,

itangkal kuyog sa pagkadaghan nga pisu,

pakan-on ug taman,

puno sa kemikal nga makapadako,

steroids ug hormone ang kinaon,

inig abot ug kwarenta dias,

andam na nga ihawon...

Ang mga tig-pangitlog

abtan ug usa ug tungga sa tuig,

una ihawon...

Tagpila ning manuka?

Tag-kinse pesos ra...

Ngano kaha?

Sabta ninyo...

Magletson ta...

sardinas nga baboy

asa man mo padulong?

asa pa, sa inyong lamesa

Kada pista,

bunyag, kasal, haya,

pasko, bag-ong tuig ug uban pa...

Samtang ang kadaghanan kanato

nagsadya ug hudyaka,

adunay mga kaliwatan,

nga magkabulag sa ilang pinalangga...

Dili nila kagustuhan,

pero sila gipamaligya,

gi-ihaw ug giluba...

Ang letson,

simbolo sa celebrasyon,

apan sa nagkaon

nga walay kalibutan

sa giagian sa baboy una maletson....

Ang kinabuhi sa usa ka letson...

ang baktin:

ang kinaon,

 puno sa hormone,

lamaw,

ug apil pa indeksyon...

patambukon,

inig abot ug tulo ka bulan

kay ihawon

lubaon

magsiyagit intawon...

apan alang kita nga masayod

ang giagian sa baboy

anaa sa iyang dugo ug unod...

inig kaon,

bantay ta kay dala ang kasakit

sa pag-ihaw

ug sa tanang hormone....

Tara magletson ta...

Maglinya ta

Mi-ingon sila,

nga ang Pinoy 

dili kamao molinya...

Mag-inilugay,

pagtaod sa ginoo sa atong ilong,

busa ang atong mga ilong kay

pislat, pangu ug lisngag....

Magkagubot,

inig tingkalawat,

inig tapos sa misa...

Pero unsa man lagi

kada kinsina,

kamao man lagi ta

maglinya

ug 

disciplina....

Nagpatabang si Sister Juana sa iyang igsuon nga si Padre Juan

Utok Pinoy Series
"Nagpatabang si Sister Juana sa iyang igsuon nga si Padre Juan"
Mugna ni Paulina Constancia 2011
(Watercolor nga Lapis sa Papel)

Dihang nagkagubot na ang barrio ni Pedro

tungod sa flyover nga itukod,

si Sister Juana nga kaba-barrio ni Pedro,

nagpatabang sa iyang igsuon

nga si Padre Juan,

nga usa ka respetado nga leader sa mga kaparian...

Mao kini ang ilang istorya:

"Manoy Padre Juan,

tabangin intawon kami nga mga kamadrehan,

kay ipabaligya na lagi ang among kumbento

ni Senyor Namulitiko kay nagsinamok lagi daw me kuno,

sa iyang flyover nga proyekto...."

Sa una nga dunay mga madre nga tukuran pud ani

imo man silang gitabanggan ug wala nadayon lagi...

Nalipay si Padre Juan 

nga mingduol ang iyang pinalangga nga manghud...

"Maayo kay mingduol ka kanako,

kani nagpaila nga kamo naay taas nga paglantaw para kanako,

Kay ako usa ka leader sa mga kaparian...

Apan kung ako lang ang pabut-on 

tabangan dayon tikaw sama sa usa ka igsuon,

Pero tunggod ako ang dako-dako sa mga kaparian

 ako usa sila nga konsulta-on..."

Minglakaw si Sister Juana,

Apan wala siya makasabot sa gisulti sa iyang maguwang nga pari...

Nangutana siya sa iyang kaugalinggon?

"Supak siya sa flyover...

Pero iyang konsultaon ang uban

nga wala kasabot bahin sa flyover..."

"Lagi bugoon ko,

pero murag kasabot man pud ko ug gamay...

Nga ang Nakasabot maoy konsultaon,

dili ang Wala Kasabot ang konsultaon..."

Pero lipay gihapon kaayo

nga mingbalik sa kumbento si Sister Juana

ug sama sa una sila nagpadayon ug paabot

sa baruganan sa iyang magulang nga si Padre Juan...

Sama sa una, nakatulog nalang si Sister Juana ug pina-abot...

Ayaw pagsaba, kay basin mamata si Sister Juana...

Padayon ang tsikahay ni Senyor Namulitiko ug Frank nga Amerikano

Utok Pinoy Series
"Padayon and tsikahay ni Senyor Namulitiko ug Frank nga Amerikano"
Mugna ni Paulina Constancia 2011
(Watercolor nga Lapis sa Papel)

Oh, ok Frank,

the World Record International TV,

alredy take movie

about my MOST USELESS PROJECT....

Ah, ok, let us continuation

our beautiful conversation....

Ok, about my plan in my barrio for many flyover....

You crazy man, always asking about PLAN,

Many plans here in my barrio:

Our specialist food is LITSI PLAN...

you know with the plenty eggs,

that is why we have plenty was died people here,

because of PLAN,

so that the reason I do not like PLAN...

because I afraid of DIE...

Because my mader who was died again

after my father was died

she said--

that faith healer saw how i will be was died again--

that in my DIE

there were plenty people

in very high place - like a bridge,

standing there and they want to speak to tell me something...

but they cannot speak- like mute but very angry...

but since you keep on INSISTENCE on PLAN...

Another plan is TOURISM PLAN...

you know, our main attraction here

is our women and children...

Many tourists come here for them..

And we made our city very tourist friendly,

you American right, even your highest official,

he recognize effort of my barrio,

he said 40% of tourism is for SEX TOURISM...

See, we give equal opportunity to tourist,

we do not discriminate to sex offender tourist,

they are tourist also,

their money is same as everybody else money,

so I say to myself,

everyone is equal under tourism...

But lately, there is SLOW DOWN

in SEX TOURISM,

because of CHILD got Killed and was died again,

I say to sex tourist,

you can PLAY with our WOMEN and CHILDREN,

any kind of PLAY,

as long as you DO NOT KILL THEM...

so that they will not be was died again and again...

You know, higher government,

very strict after child got killed,

so it scared the special sex tourist...

So, as leader of barrio,

they say I have to be flexible,

so I make a different kind of TOURISM,

I call it, FLYOVER TOURISM...

You know, we barrio leaders have regular educational field trip,

we go other countries for exposure...

One trip we go to amusement park,

with plenty roller coaster,

but because I very old and high blood,

I pray rosary that I will not die,

because I have many beautiful works at home in my barrio...

So, i come back and propose to my barrio side kicks,

and then they sign papers to show support of my project,

even if everybody else in barrio do not like project,

because they say is useless and expensive...

So I barrio leader together with my 6 sidekicks,

we make whole barrio into amusement park,

we make plenty big humps called flyovers...

put around barrio,

so that bus, jeepney, tricycle, wondercab, cars, autobus...

can go up and down the flyover...

you know so everybody can be AMUSE

when they come to my AMUSEMENT BARRIO...

especially the old peoples like me,

they will not be high blood and scared,

and will not be was died early,

it is very fun...

and plenty of tourist will come

and my barrio will get...

WORLD RECORD for:

MOST EXPENSIVE USELESS PROJECT

PROJECT WITH MOST OPPOSITION FROM PUBLIC

but also for:

MOST AMUSEMENT TOURISM PLAN...

Ang Kagang sa Utok sa Pinoy

"Utok Pinoy 2"
Mugna ni
Paulina Constancia 2011
(Batik sa Seda)

Ang kagang

ang balay tua ilalum sa yuta,

unsa may panghitabua...

nga tua naman sa sulod

sa utok sa pinoy ning kagang-nga...

Ali mga bisdak

ug atong susihun

kining panghitabua...

Sa panahun nila ni Lapu-Lapu,

maayo ang kabutang sa mga tawu...

Ming-abot ang mga bangasun nga Katsila,

bisan sila ug gipangluba,

namalik lang gihapon ug kita nahimong mga ulipon nila...

Nagdala ug mga pare 

ug kita nanga-ilad...

ang krus ang gipasaka

ug kita nangluhod...

ang krus kung balihon,

ispada diay,

ug kita pwede dungabon...

Napildi ang mga bangason,

ug nangabot ang mga amerkanohon,

nagdala ug mga maestro,

ug usab kita nailad...

kita dili na kinahanglan mangluhod,

kay kita ang buhat kay nagsunod-sunod...

Niabot ang mga hapon,

ug ang dala kay bayoneta,

kita nangahadlok,

ug dali-dali nga mingkumbawa,

gitudlo nato ang atong mga kauban,

ug sila gipangpungutan...

Nibalik ang mga amerikano

ug kita nakat-on ug reklamo,

kay kita nagsunod-sunod nila,

pero pag-abot sa hapon, 

gibiyaan ta nila...

Mingsupak ang Pilipino,

dili na daw sila sa Amerikano...

Kinahanglan daw Pinoy na ang mag-AMO!!!

Ka wala gyud natoy swerte,

Karon kay ang gahawod kay ang mga POLITIKO!!!

Maayo pa sa panahon ni Lapu-Lapu,

karon dili lang kita MANGLUHOD,

o MAGSUNOD-SUNOD,

kita kinahanglan pa MAHADLOK

nga kita MAPUNGUTAN

sa mga bag-o nga GAMHANAN...

Pero kay dili lagi kita makasukol,

kay haklok nga mabukol,

ari na lang ta sa laing paagi MAGISUG-ISUG!!!

Busa karon ang atong kinaiya,

kay sama sa SUPAKERO:

Pirming HADLOK nga Mapasipad-an
Maun-han, Malab-wan,

Mahut-dan, Mabintaha-an...
ug ang uban pa nga mga Han!!!

Busa imbis nga ang kagang 

tua sa yuta,

mingbalhin sa utok sa Pinoy...

Duna pa tay paglaum,

kay ang kagang maningkamot man gyud

 nga makagawas sa ilalum sa yuta,

mangita ug hangin, 

ug KAHAYAG!!!

Karon ang atong panahon!!!

Utok Pinoy

"Utok Pinoy 1"
Mugna  ni
 Paulina Constancia 2011
(Pastel sa Papel)

Mga sugilanong pinoy 

nga makahimuot, 

makalagot, 

ug makapugos nato 

nga maghinuklok 

sa atong mga kinaiya 

nga angay usbon 

o angay palambuon...

Si Senyor Namulitiko ug si Frank nga Amerikano

Utok Pinoy Series
"Si Senyor Namulitiko ug si Frank nga Amerikano"
Mugna ni Paulina Constancia 2011
(Watercolor nga Lapis sa Papel)

"Nagkagubot sa barrio ni Pedro,

kay dali-dali lagi kuno nga magtukod

ug TULAY miski WALAY SAPA...

Si Frank nga Amerikano,

kay anad lagi siya sa Amerika

nga pareha ug katunggod ang tawo,

siya mingduol sa kagamhanan...

"Mr. Namulitiko,

I observed in your barrio,

you have all these huge humps,

I am perplexed by your PLAN,

if you have some basis for your barrio,

do you have some kind of MASTER PLAN?

In the U.S., no project will get pass the people's support

and scrutiny without a MASTER PLAN..."

Mingtubag si Mr. Namulitiko:

"Excuse me, my name is Senyor Namulitiko,

only in the U.S. you can call Mr.,

here I am  most powerful,

you have to call me SENYOR,

What PLAN , you talk ABOUT?

I don't need PLAN.."

"It is my PLAN to have many HUMPS in barrio,

for World Record...

You know, new category,

MOST USELESS PROJECT,

MOST EXPENSIVE HUMPS,

MOST OPPOSITION FROM PEOPLE..."

"Philippines has many WORLD RECORD,

because I am most POWERFUL in BARRIO,

I want my BARRIO also to have WORLD RECORD,

I want WORLD to KNOW my POWER..."

"Excuse me, Mr. Frank

because WORLD RECORD PEOPLE already here,

they will take video for international tv,

especially now that there is BIG TYPHOON,

it is the section where I have to Prove

MY PROJECT IS MOST USELESS!!!"

Si Sr. Juana ug ang Bisita nga Amerikano

"Si Sr. Juana ug ang Bisita nga Amerikano"
Mugna ni
Paulina Constancia 2011
(Watercolor nga Lapis sa Papel)

Kahinumdum pa mo ni Sr. Juana,

ang kinamanghuran nga anak ni Nang Pising,

dili ba madre tu siya...

Kahinumdum mo nga ang ilang trabaho

kay ang pag-atiman sa mga orphan,

tigulang ug mga biniyaan sa kapalaran...

Kahinumdum mo ni Frank nga Amerikano

nga bisita ni Nang Vertudes Generosa,

mingbisita pud siya sa kombento nila ni Sr. Juana...

Nahibulong siya ngano daghan kaayo ug mga madre

nga nag-atiman sa mga biniyaan sa kapalaran...

Miingon si Frank:

"In the U.S., we have state run schools, hospitals, day cares,

and child protective services to take care of the marginalized people..."

Mingtubag si Sr. Juana:

"Yes, sir, but Philippines always want to be different,

our government cannot take care of poor people,

they are very busy taking care of themselves,

and when they get sick they come to us for help,

to ask God to take care of them also..."

"So, we very busy,

we take care of the nobody care,

we take care of the somebody who should care for nobody care..."

and when we have problem,

we go to them and all they say is

I don't care...

and that if we cannot take care

we should sell our convent..."

"My question to them is...

ok, they can have our convent,

but will they take care of the nobody who need care?

and can they take care of themselves 

when they need God when they sick and need care?

or can I be like them sir,

and just SAY, " I don't care..."

No, because I am child of God,

I always answer to their "I don't care "

is always " P.H. Care"

Please Help and Care!!!!

Si Pedro ug ang Ispisyalista sa barrio

Kahinumdum mo ni Pedro nga mag-uuma,

sa tinuod-anay pa,

dili lang siya usa ka mag-uuma,

sa ilang barrio siya ang tinuod nga KONSINSIYA.

Dihang nagkagubot ang ilang barrio

kay magtukod lagi kuno ug tulay

ang mga kadagkuan...

Mingingon si Pedro:

"Senyor, namulitiko,

nganong magtukod man mo ug tulay diha

sa akong tugkaran nga wala man nay sapa diha?"

Miingon si Namulitiko:

"Hoy ignorante nga Pedro,

wala ba ka kahibalo sa mga lab-as nga uso?

Ang uso karon sa mga ISPISYALISTA,

kay bisan WALAY SAPA,

Pwede nang tukuran ug TULAY!!!"

Mitubag si Pedro:

"Aw pasaylua gyud ko Senyor Namulitiko,

kay angkon gyud ko nga ako usa ra ka ignorante nga tawo,

dili ako ISPISYALISTA sama KANINYO...."

Maayo man kaayo mo nga mga KARPINTERO,

inyong mga ginama kay puro UNDER THE TABLE....

Maayo man kaayo mo nga mga KUSINERO,

inyong mga LUTO kay LUTONG MAKAW...

Maayo man kaayo mo nga mga BARBERO,

inyong mga TUPI kay puro SHORT CUT...

Wala gyuy makalupig sa inyong pagkamaayong laki ug ISPISYALISTA...

Ang unang adlaw ni Nang Pising sa Amerika

Kay lagi first time ni Nang Pising mubiyahe,
daghan ug bag-o para kaniya,
minglupad siya padulong sa Amerika.

Gisugat siya ni Bob,
nga pwerte gyung gwapuha,
gadala ug bulak nga sama kadako,
sa patay  nga korona,
gihagkan siya pag-ayo,
sa iyang swerete dili siya makatuo.

Gisakay siya sa awto nga ang ngalan  RTW,
Gipaningot si Nang Pising pag-ayo,
kay siya gidala sa disierto,
ang iyang lawas intawon gakalayo,
wala siya mag-tuo nga ang Amerika diay walay esno.

Ming-abot siya sa usa ka dako nga lugar nga kinural,
mingkalit ug abli ang pultuhan,
ug sila mingsulod sa usa ka lugar  nga dunay dako nga linaw,
galinya ang mga palasyo nga pwerte ka kuyaw.

Mingsulod sila sa balay ni Bob,
dunay dako kaayo nga swimming pool,
dunay walo ka kwarto, duha ka kusina,
duha ka sala, ug banyo nga pwerteng daghana.

Nanga-on sila sa dako nga lamesa,
nga pwerte pa gyung ta-asa
ang ilang sud-an kay puro sagbot nga hilaw,
respeto siya nga mingkaon,
iyang kuto-kuto gahungaw...


Gidala si Nang Pising sa iyang kwarto,
ang iyang kasing-kasing gaulbo-ulbo,
dili gihapon siya makatuo,
sa iyang Bob nga gwapo,
ug sa dakong swerte niya nga mingtugpo!!!

Naabot gyud si Nang Pising sa Amerika

Dili ba, gakulba hinam na kamo,
kung kinsa ang nagdala ni Nang Pising sa Amerika?

Mao kini ang sumpay sa sugilanon...

Si Nang Pising mingdagko na ang mga anak,
maayo na sila ug mga trabaho,
ang mga lalake namilyonario,
ang mga babaye nagserbisyo publico,
pero wala gyud siya mingbiya sa ilang balay,
kay alegre kaayo ang ilang mga kasilinganan.
Naa gihapon siya gapuyo ilalum sa tulay nga kilid sa sapa.

Gisige siya ug awhag sa iyang mga anak nga mubalhin,
tukuran kuno siya ug mansion nga dunay swimming pool,
anha sa kinural nga kumunidad,
diin ang iyang mga silingan kay englis paka ug mga katsila,
palitan siya ug mga awto nga gihinganlan ug RTW, volvol, ug marsidis beans,
taga-an kuno siya ug LOREX nga relo, luis bituon nga bag, purogamo nga sapatos,
chanel 7 nga perfume, gutsi nga pitaka...

Kana tanan iyang gibalibaran,
dili niya ikapuli sa iyang kawayan nga balay nga hayahay,
sa iyang mga bisdak na kumadre nga lab-as ug balita kada buntag,
sa iyang pwede ra laktong nga mga panginahanglan,
kay siya kontento sa paglantaw sa kalangitan para sa kataknaan,
sa iyang buyot,  bakya, agwa nga sinuruyan, ug kwarta nga linastikuhan.

Pero kay mingpugos gyud ang iyang mga anak nga tabangan siya,
iyang giingnan nga pwede siya mamuhunan ug usa ka negosyo.
Gisugdan siya ug usa ka internetan,
kay maoy uso sa ilang kasilinganan.

Nakat-on ug chat si Nang Pising,
kay magsige man siya ug bantay sa iyang internetan.
Tibuok adlaw dunay mga lain-lain nga lalake nga ka-chat si Nang Pising.
Hangtod dunay usa nga desidido gyud kang Nang Pising,
gi-anhi siya sa Cebu kay lagi nahigugma siya kaniya.

Tungod kay nagmingaw si Nang Pising,
siya nalingaw pud aning lakiha nga si Bob.
Nakuhaan siya ug financee visa,
ug walay panamilit sa iyang mga anak,
ming-adto sa Amerika,
kay export quality daw lagi pud siya,
sama sa iyang mga anak nga doktor, pari, madre ug maestra.

So, ang nagdala ni Nang Pising sa Amerika kay GUGMA,
dili ang iyang mga anak nga doktor, pari, madre ug maestra!!!

Pista sa Parokya ni Padre Juan

Alegre kaayo ang pista,
sa Parokya ni Padre Juan,
ang patron kay si San Miguel,
ang santo ug ang brown nga botelya.

Daghan ug kalihukan,
rayna-rayna, diskoral,
pabuto ug kwetes,
paninda,
ug sugal:
sama sa roleta,
itsa itsa ug sinsiyo,
tag-an tag-an ug numero,
baraha, pusil-pusil,
shot-shot ug bola,
ug uban pa,
mura ug casino sa gawas sa simbahan.

Diha tuy usa ka tawo nga naninda,
iyang ngalan kay si Nong Honorio,
daghan kaayo ug mingduol,
kay kuno barato ang iyang mga baligya:
imported nga shampoo, lotion, conditioner, body wash.
Mahal kuno ni kaayo kung paliton sa tindahan.

Dihay bata nga nangutana:
"Ngano man nga barato man na?
Expired na no?"

Mingtubag si Nong Honorio:
"Dili ni expired uy,
Bag-o gyud ning deliver,
kahinumdum mo sa grocery nga nasunog gahapon,
samtang nagdinaganay ang mga tawo,
samtang gitabang sa mga bombero,
and mga tindera ug tindero,
Nitabang pud sila ug panghipos,
NAG-IYAHAY PUD SILA UG PANGAWAT!!!

Nitubag ang bata:
"Dili ka kuyawan ana Nong Honorio,
ang imong baligya kay kinawat,
unya imong gibaligya sa tugkaran sa simbahan,
basin ka KILATAN ana Nong Honorio,
ug GABA-AN!!!"

Mingkalit ug KILAT,
ug nakuyawan, nga naglagot si Nong Honorio:
"Ug dili ka mopalit,
ayaw na lang ug daghang sulti,
IMO PA KONG PA KONSENSIYAHON!!!"

Maayo gyud Mosermon si Padre Juan

"Maayo gyud Mosermon si Padre Juan"
Mugna ni
Paulina Constancia 2011
(Watercolor nga Lapis sa Papel)

Kay si Padre Juan nailhan na sa mga kaparian,

daghan ug seminarista nga na-assign didto kaniya...

Gitudluan niya ang mga bag-ong tubo nga pari

kung unsaaon pagsermon...

Ang paborito nga sermon ni Padre Juan

kay kabahin sa mga balaod sa gobiernyo,

kabahin sa katungod sa tawo,

kabahin sa  iyang panlawasnong mga buhat....

murag man to ug bahin sa ph care,

basta duna gyud tuy letter h...

Busa kay pari lagi kuno siya,

ang iyang tanan nga sermon

bahin sa pagsupak sa pag-gamit ug pills, condom, iud, injectible ug uban pa...

Bisan ug haya, ang patay hisgutan nga dili mag-condom,

bisan ug bunyag, ang bag-ong tawo hisgutan ang IUD,

bisan ug first communion, hisgutan ang  sex edukesyon,

bisan ug pista, hisgutan ang aborsyon,

bisan ug last rites sa himatyon, hisgutan kabahin sa same sex nga kaminyuon,

bisan ug nagbisita ug masakiton, hisgutan ang dili pag-inum ug pills,

bisan ug gradwesyon, hisgutan ug birth control nga indeksyon

Usa ka adlaw,

dunay usa ka babaye nga buntis,

nga mingduol kang Padre Juan,

malipayon kaayo siya nga mingbalita :

"Padre, nabuntis na gyud ko nimo!!!

Lipay kaayo ko."

Nahilaw si Padre Juan,

ug gipadaplin ug estorya ang babaye:

"Virginia, ayaw pagsaba diha,

Ngano man , intawon nga nabuntis man taka?

Nga ga-IUD ka, ga- INJECTIBLE pa,

Dili man gyud unta ka MABUNTIS!!!"

Nagkatawa si Virginia:

"Padre Juan, dili lagi unta ko madutlan,

kay armado ko sa IUD ug INJECTIBLE,

pero sa sige nakong paminaw sa imong sermon,

NADUTLAN GYUD KO!

Nituo ko nimo, kay maayo man kaayo ka musulti,

akong GIPATANG-TANG ang akong IUD,

ug akong GIPAUNDANG ang akong INJECTIBLE."

Suko kaayo si Padre Juan:

"Wala ka nabuang Virginia,

katong tanan nakong gisulti sa sermon,

para ra to sa mga NAMIMBA ug mga SEMINARISTA....

WALA TAY LABOT ADTO!!!"

Nganong Respetado si Nang Vertudes Generosa

"Nganong Respetado si Nang Vertudes Generosa"
Mugna ni
Paulina Constancia 2011
(Watercolor nga Lapis sa Papel)

Diha tuy usa ka Manang,

respetado kaayo siya sa ilang barangay.

Ang iyang ngalan kay si Nang Vertudes Generosa,

Sa ilang barangay, siya konsehala;

Sa ilang kapilya, siya hermana;

Sa ilang asosasyon, siya presidenta;

Sa ilang balay, siya ang hefa de casa;

Busa daghan kaayo ug tawo gaadtuan sa ilang balay,

Sige siya ug hikay,

Daghan ug kalingawan sa ilang balay,

karaoke, computer games, majong, baraha, hantak,

inum, ug sugal dili gyud magbulag.

Daghan kaayo ug mga gaandar nga aplayansis:

air-con, fregider, tv, computer, karaoke machine,

washing machine, microwave, toaster, electric stove,

tanan, nganli ninyo naa na sa balay ni Nang Vertudes Generosa.

Usa ka adlaw dunay siya'y usa ka bisita,

ang iyang ngalan kay si Frank nga Amerikano,

ug siya naglingo-lingo.

"My god Vertudes Generosa,

You must be paying so much for your electric bills?"

Mingtubag si Nang Vertudes Generosa:

"No Frank, I pay almost zero,

because, my son, very smart,

topnotcher in electrical engineering exam,

then he work in electrical company,

he know very well how to connect electricity from electric post."

"So, he said me, Mama Vertudes Generosa,

after you very good mother to me,

very good example of good works,

you send me best school,

I topnotcher, I good job,

I pay back to you,

I use all my knowledge,

to help you,

that you no longer need to pay electricity."

"My son, very smart,

he help everybody in community,

he teach everybody,

HOW TO STEAL ELECTRICITY!!!"

"Now, I'm very famous here,

everybody like me,

I give FREE ELECTRICITY  to everybody:

to kapilya, to basketball court, to diskoral,

to all my friends, even my enemies,

to all my neighbors."

"Because my name is Nang Vertudes,

I am very virtues,

and my second name is Generosa,

I am very generous!!!

Andam si Inocencia nga nanganak

Diha tuy usa ka nars,
ang iyang ngalan kay Inocencia,
nagtrabaho siya sa ospital sa gobierno,
wala siya'y daghang saba,
trabaho lang siya,
walay ikareklamo ang iyang mga kauban.

Pagsugod niya ug trabaho sa ospital,
kay buntis na siya ug usa ka bulan.
Pagka-abot sa iyang tiyan sa siyam ka bulan,
nanganak na siya sa ospital.

Pag-gawas niya sa ospital,
wala gyud siya'y nabayran.

Nahibulong ang iyang mga amiga,
maayo na ba diay ang ospital sa gobierno karon,
nga kumpleto na diay sa gamit unya libre pa gyud.

Mingkatawa pagdako si Inocencia:
"unsay kumpleto gud...
Dili uy!!!"

"Ang ospital sa gobierno,
mao lang gihapon,
walay mga gamit,
unya ug manganak ka,
magdala ka ug imong:
maskara, gunting, betadine,
gauze, tambal, dagum ug hilo,
ug uban pa..

Kabalo na man ko ani,
naa gud ko sa ospital trabaho.
Ang akong gibuhat,
nangandam gyud ko,
samtang gapatak ang mga bulan sa akong tiyan,
Ako pud, ang akong mga kinahanglanon sa pag-panganak,
Ako pug nga GIHINAY-HINAYAN ug KAWAT!!!

Di, Libre ko TANAN!!!

Ang Tiya nga tua sa Amerika

Diha tuy usa ka Tiya,
sa Pilipinas siya ming-biya,
Diha siya puyo sa Amerika,
ang mga pag-umangkon sa Pilipinas kay sobra ka pinalangga.

Ang kinabuhi sa Tiya sa Amerika,
mag-kinamot ug laba,
mag-lakaw padung sa opisina,
magsige ug putol ug coupon sa periodiko,
para ibayad sa grocery pang kunsumo,
sa sulod sa balay mag sweater ug maghabul,
kay dili mag-heater inig winter,
hapit nalang maghubo,
kay dili mag-aircon inig summer,
para mag tigum ang kwarta ug mapadala,
sa mga pag-umangkon nga pinalangga.

Ang kinabuhi sa mga pag-umangkon sa Pilipinas,
dunay labandera nga ang pag-laba di makina,
magsakay ug awto miski walay trabaho,
mag-kaon sa restaurant ug sila di-Vino,
gabaga ang credit card ibayad sa mga bisyo,
mag-aircon tibuok adlaw,
ug mag-sweater tunggod sa katug-naw,
kay daghan kaayo ug kwarta,
pinadala sa Tiya nga tua sa Amerika.

Ang tiya sa Amerika,
nagpakabuang ug trabaho;
Ang mga pagumangkon sa Pilipinas,
nagpahayahay pag-ayo ug gabisyo.